Die Hoërskool Centurion is 'n Afrikaansmedium hoërskool geleë in die voorstad Lyttelton Manor in Centurion.

Die skool is in 1958 gestig en vier in 2008 sy 50ste bestaansjaar.

‘n Gebalanseerde opvoeding word aan elke Woerie gebied. Die Hoërskool Centurion wil elke leerder as totale mens ontwikkel met die nodige kennis en praktiese ondervinding om die beroepslewe met vertroue aan te pak. Die skool bied ‘n wye vakkeuse, ‘n verskeidenheid kultuur- en sportaktiwiteite en hope geleentheid vir mensontwikkeling. Centurion bied uitstekende akademiese onderrig, puik onderrigfasiliteite en hoogs gemotiveerde en entoesiastiese personeel. Om elke individu se volle potensiaal te ontgin, bied ons ook verrykende en karaktervormende kultuurbeoefening, vele sportgeleenthede, skitterende sportuitslae en hope geleenthede vir gesonde pret!

As leerder van Hoërskool Centurion, aanvaar ek die verantwoordelikheid, om na die beste van my vermoë:

1. die leuse van die skool te help uitbou deur persoonlik "Steeds Hoër" te strewe en ook alle ander leerders daartoe aan te moedig.

2. lojaal te wees teenoor die skool, die onderwysers, my medeleerders en elke aktiwiteit wat in verband met die skoollewe staan.

3. my ten alle tye waardig te gedra, sodat my optrede steeds die skool tot eer sal strek.

4. my skoolklere altyd in ere te hou en daardeur nooit die eer van die skool in gedrang te bring nie.

5. altyd 'n waardige voorbeeld te stel, deur die skoolreëls nougeset na te kom en ander te help om dieselfde te doen.

6. opreg, vriendelik en hulpvaardig te wees in my optrede teenoor my meerderes, gelykes en minderes, dog ferm stelling in te neem tot bevordering van die algemene welsyn van die skoolgemeenskap.

7. deur my optrede steeds die Christelike karakter van my skool gestand te doen en trots vir ons nasionale, volkseie aan te wakker.

8. aan my skoolloopbaan mee te help, om 'n trotse beeld van my almamater uit te bou.